L'anguleru llega a Avil├ęs




15 d'Avientu de 2016

 

Esti vienres 16 d’avientu, a les 19:00 hores, la Factoría Cultural acueye la celebración de la II Folixa de Nadal. L’actividá inclúi un cuentacuentos sobre L’Anguleru, la visita de los llendadores de la Ría d’Avilés y la llectura del conxuru al Nataliegu polos escolinos y escolines del Colexu de Sabugo. Amás, la conceyala de Cultura, Yolanda Alonso, va entregar una placa al Mestru Llendador del añu, que nesti 2016 va ser Don Pedro Solís Vílchez.

L’actividá va principiar cola última sesión del añu de “La Reciella na Factoría”, un ciclu d’actividaes escéniques pa neños y neñes qu’entama’l Conceyu d’Avilés en collaboración cola asociación Reciella-Families pol Asturianu. Pa poner el ramu a les actividaes d’esti añu, Olga Cuervo va representar el cuentu “L’anguleru: suaños de Navidá”.

Depués va ser el turnu de los llendadores de la Ría d’Avilés,
que van repartir dalgún regalín a los/les asistentes y recoyer les cartes pa L’Anguleru. Trátase d’unos personaxes xenuinamente avilesinos que tán inspiraos nos primeros trabayadores de la Rula d’Avilés y que, amás de defender la pesca tradicional, ayuden a L’Anguleru nel so trabayu de repartir regalos na nueche del 24 d’avientu.

Per otru llau, depués de que los neños y neñes del Colexu de Sabugo llean el conxuru del Nataliegu, la conceyala de Cultura, Yolanda Alonso, va entregar una placa como homenaxe a una personada rellacionada cola mar o la Rula d’Avilés. Nesta ocasión va dir pa Pedro Solís Vílchez, pescador retiráu que lleva bregando tola vida pola pesca tradicional. Trátase d’una tarde de fiesta pa tolos públicos na que, amás de Reciella, collabora l’asociación Garabuxada y Víctor Raúl Pintado Rey, maestru de primaria n'Avilés.

L'Anguleru

L’Anguleru vive tol añu na Mar de los Sargazos, cerca d'América, curiando de les anguiles y les angules, hasta que’l 24 d’avientu aporta a Asturies na so chalana -llamada L'Angulina- y aprovecha pa pescar angula, vendela na rula y mercar regalos a los neños y neñes col dineru de les ganancies. Entra n'Asturies pel ríu Nalón, onde los habitantes de L'Arena recíbenlu nuna cabalgata. Depués d'esti recibimientu, percuerre tolos ríos, llagos y otros llugares nos qu'hai agua pa visitar tolos llares asturianos. Pa reponer fuercies, neños y neñes tienen que dexar un gorru de llana a los pies del árbol de Navidá con comida y bebida.

Ver cartel de l'actividá


Volver