Esposición “De les lletres a les imáxenes. Los cartelos de les Xuntes d’Escolines y Escolinos d’Avilés”, de Miguel Solís

Les Xuntes d’Escolines y Escolinos d’Avilés ye una actividá que desenvuelve’l Conceyu d’Avilés per aciu de la Estaya de la Llingua dende hai dieciséis años. Ta pensada como un foru d’alcuentru del alumnáu de dellos niveles de Primaria, Secundaria y Bachilleratu qu’estudia l’asignatura de Llingua Asturiana; foru onde s’intercambien esperiencies, trabayos sobre llingua y lliteratura asturianes, s’amuesen proyeutos y, sobre too, onde alcontrase, conocese, rellacionase y pasar una xornada nun ambiente de diversión, solidaridá y amistá.

Diez d’esos dieciséis años, Miguel Solís Santos, aportó la so obra pictórica, en forma de cartelos anunciadores de cada Xunta, cola temática que cada añu tenía la Selmana de les Lletres Asturianes: la música, el teatru, el cómic, y diferentes escritores en llingua asturiana a lo llargo los sieglos. Esta coleición de diez cartelos ye la que s’enseña equí xunto con una riestra d’otros que fizo por encargu del Conceyu d’Avilés del auditoriu de la Casa la Cultura y el teatru Palacio Valdés, con motivu del décimu aniversariu de la reinauguración del teatru.

Miguel Solís Santos naz n’Avilés en 1956. Llicenciáu en Bioloxía. Profesor de Bioloxía y Xeoloxía nel IES Carreño Miranda. Académicu correspondiente de l’Academia de la Llingua Asturiana, dende la so creación, escritor y dibuxante.

Ye autor de la primer novela en Llingua Asturiana Les Llamuergues Doraes. Ganador en varies ocasiones del Premiu Xosefa Xovellanos de Novela y del Enriqueta Rubín de Periodismu en Llingua Asturiana, en 2007. Accésit na edición de 2000 del Premiu Fuertes Acevedo con La Memoria de les dos Orielles (aprosimación al estudiu de les xeneraciones astur-cubanes). Autor de la novela xuvenil El Misteriu de la Cámara de Cuarzu.

Dibuxante y guionista de delles histories ilustraes, onde destaquen La Hestoria d’Avilés y el trípticu que fizo va poco pal V Centanariu de Pedro Menéndez (2019).

Escritor y dibuxante de cuentos pa neños y neñes, como la coleición de Ñuberu, Nosotros los Pexes, Les Xanes, El Cuélebre y La Guaxa -cola so torna al Gallego-Asturiano entitulada A Bruxa-, tamién ye ilustrador de llibros d’otros autores. Collaborador en periódicos asturianos y varies revistes.

Cartelista, autor de varies obres, ente les que destaquen la coleición de les Xuntes d’Escolines y Escolinos d’Avilés -motivu de la presente esposición-, la riestra cartelos del auditoriu de la Casa la Cultura o’l teatru Palacio Valdés y otros que fizo pa diferentes campañes y actividaes, como Navigatio de Samalandrán o Sestaferia del Intercélticu d’Avilés.

Horariu: Llunes a vienres de 9:00 a 14:00h.

PDF esplicativu de la esposición