Pa que nun t’aburras 2021: ENTETEYANDO

Con esti taller neños y neñes van averase de manera prestosa y práctica a les Construcciones populares y la so rellación colos oficios tradicionales. Nesti sen van convertise en teyeros o teyeres y espresar la so creatividá faciendo la so propia teya pa lluéu decorala colos símbolos de l’arquitectura tradicional que más-yos presten.

Pa que nun t’aburras 2021 ye un ciclu pa esti primer semestre del añu formáu de cuatro talleres infantiles, pa neños y neñes de 5 a 10 años. La duración de cada taller ye de media hora y l’horariu pa velos o descargalos, les 11:00 hores.

Los talleres van tar guiaos por  ALADANZA, frutu del saber profesional, formativu y vital de Rosa Cuervo, educadora infantil que se formó en munches metodoloxíes educatives y artístiques. Dende 1990 dedícase a la recoyía, enseñanza y difusión de la cultura tradicional asturiana, n’especial nel ámbitu rellacionáu col baille y la música, lo que-y valió pa consiguir, amás d’una esperiencia grande, una visión abierta y integradora del folclore na que l’asturianu ye la llingua de comunicación y rellación.

Nes redes sociales del Conceyu d’Avilés, na páxina web de la Estaya de la Llingua, na revista dixital de la fundación Municipal de Cultura  y na plataforma dixital PlayPresta. van podese ver o descargar estos talleres.