Día de la Llingua Materna

La ONU, nel día de la Llingua Materna, quier dar puxu al multillingüismu y la diversidá cultural. Ente otres munches actividaes, va proyeutase un documental danés qu’afonda nesa variedá llingüística, reparando en que la metá de les 6.500 llingües qu’hai en mundu van desapaecer pa lo cabero’l sieglu, al ritmu d’una cada 14 díes. La direutura xeneral d’esti muérganu oficial, Irina Bokova, señaló nel so mensaxe pa esta ocasión que les llingües son los meyores preseos pal entendimientu y la tolerancia. “El respetu a toles llingües ye perimportante p’afitar la convivencia pacífica, ensin refugar nin a les sociedaes nin a les persones que les formen”.