Presentación de “Volvemos en 6 minutos”
Compartir
Presentación del llibru de Diego Solís, a cargu de la escritora Esperanza Medina, Volvemos en 6 minutos, el vienres 28 d’abril del 2023 a les 19:00 hores nel Palaciu de Valdecarzana.
La entrada ye llibre hasta completar aforu y va regalase’l llibru a les 10 persones que lleguen les primeres.
Diego Solís ye un escritor y filólogu ñacíu en Xixón (1991). fundador del movimientu Fame poétika y co-direutor de la revista de lliteratura moza, Formientu.
Diego escribe en castellán y n’asturianu, y tien varies publicaciones nes dos llingües, como Hágase Abril, Cállanos con esa música, o, Y El mundu marcha . Ganó’l premiu Asturies Xoven de Poesía en 2018.
Participó tamién en publicaciones coleutives como revistes y antoloxíes onde asoleyó rellatos y poemes suyos.
Volvemos en 6 minutos
La idea d’escribir esti llibru víno-y al escritor viendo la televisión y fixándose nos anuncios y tamién nes valles publicitaries que diba atopando y que teníen una ciertu puxu poéticu o que, polo menos, podíen llegar a funcionar dientro d’un poema o d’un testu lliterariu.
El filu conductor ye en concretu’l “zapping”, dalguien que ta viendo la tele y va cambiando de canal d’un sitiu pa otru. Cada parte del llibru ye una canal, una aplicación del móvil o una plataforma de series y en caúna d’elles los poemes son películes y anuncios concretos de dalguna marca nos que se xuega col eslogan, dándo-y la vuelta. Xuégase tamién cola ironía y entemezse con testos clásicos, poesía d’anguaño, referencies al cine, a la música a la cultura pop…
El llibru ye novedosu, aparte de pola mesma idea testual, que yá tien un ciertu interés, tien la particularidá de que cada poema va llevar asociáu un códigu QR col que se va poder sentir el poema recitáu y qu’en dalgún casu, tamién va llevar un vidiu nel que sal el propiu autor o dalgo rellacionao colo ques e ta recitando. Ye una forma de sacar el poema del testu y que se faiga d’una forma prestosa y dinámica.
La edición tien imáxenes de la ilustradora Inés H., que les fizo especialmente pal llibru, al poco de tar escritos los poemes.
