XI Xuntes d’Escolines y Escolinos d’Avilés y la redolada

Los díes 12 y 13 de mayu l’auditoriu de la Casa Cultura del Conceyu d’Avilés acueye les actividaes de les XI Xuntes d’Escolines y Escolinos d’Avilés y la redolada. Esti añu dedíquense al cómic.

Ta prevista la participación de 630 escolinos y escolines de 16 centros educativos d’Avilés y la redolada, que s’especifiquen darréu: d’Avilés asistirán,  CP Marcelo Gago, CP Sabugo, CP Poeta Juan Ochoa, CP Villalegre,  Colegio Santo Tomás, IES Carreño Miranda,  IES Virgen de La Luz, IES Nº 5 e IES Menéndez Pidal.  Y de la redolada: CP Castillo de Gauzón, CP Manuel Álvarez Iglesias, CRA Castrillón-Illas y IES Los Campos.  El día 12 participarán escolares de primaria, a partir de les 10:30 hores y el día 13 toca’l turnu a la mocedá de Secundaria y Bachilleratu, a partir de les 12:00 hores. Como centru invitáu tará l’IES de Nava que tamién va visitar el Muséu Urbanu de la ciudá, con una visita guiada que-y ufre’l mesmu muséu.  Ente les actividaes que se van amosar pa esi día, habrá l’estrenu d’abondes representaciones, cuentos, recitales de poesía, música, bailles, dances y trabayos d’investigación. Esta puesta en comuña ye’l resultáu del trabayu a lo llargu d’esti tiempu de los talleres que se dieren nes aules, a cargu de la compañía teatral asturiana Nun Tris. Esti añu hai una novedá pa los IES y ye que participen nun concursu, nel  que pa escoyer el meyor trabayu presentáu habrá un xuráu na sala, formáu por profesionales del teatru, les artes plástiques y un especialista en llingua asturiana. El trabayu ganador recibirá un premiu de 300 euros de material escolar empobináu a la clase d’asturianu.