VI Xuntes d’escolines y escolinos d’Avilés y Comarca

Doce colexos y institutos d’Avilés y Comarca van participar nes VI Xuntes d’escolines y Escolinos. Enriqueta González Rubín sedrá la protagonista esti añu d’estes Xuntes, entamaes pola Estaya de la Llingua d’Avilés. L’actu celebraráse nel Auditoriu de la Casa Municipal de Cultura nos díes 4 y 5 de mayu. Los escolinos y escolines yá trabayen en talleres la vida y la obra de la autora pa poner en común estes xeres nel Auditoriu. La participación ye d’un total de 600 neños y neñes. Pa poner puntu y final a estes Xuntes, el día 5 de mayu la Federación Xuntanza, fadrá una amuesa del folclore del oriente d’Asturies, fastera a la que perteneciera Enriqueta González Rubín.

El diseñu del cartel anunciador ye del pintor y escritor Miguel Solís Santos, onde la simboloxía sobre la vida y l’autora queda enforma asoleyada. Con colores seles, l’autor reflexa la vida romántica del sieglu XIX, nel que viviere Enriqueta. De la pluma de l’autora salen delles de les histories qu’ella escribiere nel periódicu El Faro Asturiano. Hai presencia tamién de la dómina d’Enriqueta col dibuxu de la imprenta y per otru llau tenemos la modernidá que representen la neña y el neñu que trabayen nel ordenador. Vemos embaxu’l cartel a la “Gallina Vieja”, pseudónimu col que firmaba la periodista munchos de los sos escritos.