8 de mayu, Día de les Lletres Asturianes
Compartir
L’Academia de la Llingua Asturiana (ALLA) anunciaba va unes selmanes que’l Día de les Lletres Asturianes, qu’habría celebrase esti vienres 8 de mayu, quedaba aplazáu por cuenta de la crisis sanitaria.
D’alcuerdu cola Conseyería de Cultura, Política Llingüística y Turismu y cola Dirección Xeneral de Política Llingüística del Gobiernu d’Asturies, l’Academia camentó que la situación provocada pol coronavirus COVID-19 aconseyaba l’aplazamientu de tolos actos previstos pa la Selmana y el Día de les Lletres Asturianes hasta la seronda. Agora, l’alcuerdu ente dambes partes apurre unes feches posibles, siempres que se dean les condiciones sanitaries y sociales y afayadices: del 28 de setiembre al 2 d’ochobre pa la Selmana y el 2 d’ochobre pal Día de les Lletres Asturianes.
La Estaya de la Llingua, poles circunstancies d’organización nun puede aplazar l’actu que siempre prepara pa esta fecha tan señalada, les Xuntes d’Escolines y Escolinos y, como tampoco puede facese agora presencial, decide nesti día 8 de mayu nel que taben previstos los actos d’homenaxe a la Llingua Asturiana, asoleyar un vidiu conmemorativu de los 16 años que se vienen faciendo de les Xuntes, pa nun dexar esti añu, que cumpliríen los sos 17 años, como un añu ermu pa elles.
Pa ello va emitise un vidiu conmemorativu que recueye dellos momentos destacaos d’estos 16 años de les Xuntes d’Escolines y Escolinos d’Avilés
Ye una actividá na que s’impliquen los centros educativos d’Avilés. Nos primeros años la participación fízose tamién estensible a los de la redolada, hasta hai unos años, onde la participación foi sólo de les escueles y institutos d’Avilés, teniendo siempre la collaboración de fuera del Conceyu d’Avilés, del CRA Castrillón-Illas.
Ye un eventu homenaxe a la Llingua Asturiana cola participación de los centros de Primaria nos niveles de 4u, 5u y 6u, que dan l’asignatura de Llingua Asturiana y dempués Secundaria y Bachilleratu.
La participación ye siempre d’unos 15 centros con actividaes de toa mena: obrines de teatru, llectura de testos, cantares, bailles, música, audiovisuales, con temes mui diferentes en tou esti tiempu.
Dedicáronse les Xuntes a escritores en llingua asturiana como Maria Teresa González, Berta Piñán, Miguel Solís, ente otros y otres; tamién a temes diferentes como’l teatru, la música o’l puertu d’Avilés pol so centenariu. Esti añu diba dedicase al teatru Palacio Valdés, pero nun pudo ser.
La dinámica de les Xuntes ye diferente según seya pa Primaria o Secundaria.
Los centros de Primaria participen preparando l’actividá nes clases col sofitu de profesionales, como ye’l casu de la compañía de teatru asturiana Nun Tris, con Inma y Antón que-yos echen un gabitu y coordinen too. Dempués un día del mes d’abril o mayu, coincidiendo cola Selmana de les Lletres Asturianes, xuntámonos na Casa la Cultura, principalmente, magar que tamién se ficieron n’otros escenarios, como nel teatru Palacio Valdés o nel auditoriu del Centru Internacional Óscar Niemeyer, y vemos nel escenariu lo trabayao a lo llargo de los dos meses anteriores nes aules.
Los centros de Secundaria participaben de la mesma forma que los de Primaria, pero nun-yos prestaba muncho; asina que quixeron cambiar el formatu y usar l’audiovisual como forma más afayadiza de participación pa ellos, presentándose a un concursu, nesti casu col gabitu de profesionales nesta materia; asina trabayen el tema propuestu pal añu a mou de talleres, nun formatu col que se sienten más a gustu.
Hai de dicir que pa les escueles tamién hai un concursu. Nos primeros años foi’l Concursu de Mascotines, faciendo la mascotina del añu, siempre col mesmu tema de les Xuntes y con esos trabayos facíase una esposición. Col tiempu pensóse en facer que’l concursu fuere pa dibuxar el cartel de les Xuntes, qu’otros años foi xera de Miguel Solís.
Les entregues de los premios nos primero años yeren nel Palaciu de Valdecarzanana y nos últimos seis años na Casa Conceyu, cuntando siempre cola presencia de les autoridaes del Conceyu.
Esti añu sedríen les XVII Xuntes d’Escolines y Escolinos, el trabayu yá taba entamáu, pero nun pudo ser; poro, facemos esti vidiu n’homenaxe a la Llingua Asturiana nel so día y pa que les Xuntes nun pierdan nin un solu añu de presencia nestes feches tan señalaes, como homenaxe, respetu y cariñu a la milenaria llingua d’Asturies.
