Asturies tuvo presente na edición 2009 de ‘Expolingua Lisboa’ con un ‘stand’ lliterariu con 40 autores representaos

Asturies tuvo presente na edición 2009 de la feria “Expolingua Lisboa” (del 4 al 6 de marzu), una feria que, dende 1989, se celebra na capital portuguesa, y que ta dedicada al estudiu de les llingües.

La directora xeneral de Política Llingüística, Consuelo Vega Díaz inauguró’l “stand”, en compañía de Roberto González Quevedo, secretariu de l’Academia de la Lingua Asturiana, y Marta Magadán Díaz, presidenta del Gremiu d’Editores d’Asturies. L’actu contó tamién cola presencia de los conseyeros d’Educación y Cultura de la Embaxada d’España en Portugal y con una representación del Institutu Cervantes de la capital portuguesa ente otres autoridaes y públicu.

L’espaciu dedicáu a la llingua asturiana, de 18 metros cuadraos, mostró títulos de 40 autores asturianos, amás d’información turística y etnográfica d’Asturies y la presencia de polo menos diez editoriales asturianes, ufiertando a los visitantes información en dellos idiomes sobre la llingua asturiana, la so historia y situación xunta una muestra de publicaciones, diccionarios, gramátiques y normativa.

Aprovechando la celebración de la feria, presentóse nel Institutu Cervantes de Lisboa una antoloxía poética billingüe, coeditada pol Gobiernu del Principáu y la editorial Trea y coordinada pol escritor Xuan Bello. El llibru, “Una mirada diversa-Una olhada diversa”, inclúi una muestra de poemes, en portugués y tornáu al asturianu, de dellos autores del país lusu.