Fiesta de Les Comadres

Les Comadres ye una fiesta que se celebra n’Asturies y n’otres fasteres como’l País Vascu, Segovia o Zamora, el xueves enantes del martes d’antroxu. Esisten varies teoríes respeuto al so orixe. Paez ser que la que garra más puxu ye la de que s’afita nes nomaes Matronalias, fiestes romanes dedicaes a les muyeres casaes, que se celebraben n’honor de la diosa Xuno, tamién conocida col nomatu de Matrona. Celebrábense nes calendes del mes de marzu y yera la única vez nel añu que les muyeres teníen los mesmos privilexos que los homes nesa sociedá patriarcal romana.

Nos pueblos d’Asturies sirvía esta fiesta p’aconceyar a les muyeres, en concretu les comadres (la ma y la madrina) pa poder vese polo menos una vez nel añu, porque les comunicaciones ente pueblos nun yera fácil y pasaben tiempu ensin tar xuntes. Cuando s’axuntaben, estes muyeres compartíen mesa (a la hora la merienda) con comida típica d’esa dómina como la tortiella de chorizu, la empanada, el bollu preñáu y como postres los fixuelos, picatostes, bollines o casadielles, propios del antroxu. En La Pola (Siero), onde se celebra de forma multitudinaria, nun falta’l bollu preñáu, la sidra y la naranxa de postre.