La hestoria l’Anguleru

L’Anguleru ye un pescador asturianu que vive na Mar de los Sargazos curiando de les angules y les anguiles y que trai regalinos a les neñes y neños la nueche del 24 al 25 d’avientu.

Partiendo del trabayu desarrolláu sobre L´Anguleru, pol Grupu Infantil Villa Allegre d’Avilés, el Colexu Públicu Xovellanos de Panes, dientro del so Proyeutu de Participación Familiar y Competencies Parentales, nel que participen el Centru de Profesores y Recursos Xixón-Oriente y la Universidá d’Uviéu, escueye como elementu motivador pa puxar pola implicación familiar na dinámica del centru, a esti amorosiegu y misteriosu personaxe navidiegu.

L’éxitu de la esperiencia, na que collaboraron distintes instituciones como la Estaya de la llingua d’Avilés, asociaciones y grupos socioculturales, amenó la fechura del llibru La hestoria l’Anguleru, que nun dexa de ser un exemplu guapu del trabayu que se desenvuelve na escuela, pero n’andecha cola familia.

L’Anguleru ye un cuentu de Navidá igual que’l de los Reis Magos o Pá Noel.

La tradición de los Reis Magos vien dende la cita bíblica que cuenta cómo llegaben a Belén persones d’otros países al ñacer Xesús de Nazaret, pa rindi-y homenaxe y llevándo-y regalos con munchu valor simbólicu como l’oru, l’inciensu y la mirra.

La lleenda, el personaxe de Pá Noel, inspírase nun obispu llamáu Nicolás, que repartió los sos bienes ente los que más lo necesitaben y dedicó tola vida a ayudar a la xente más probe.

L’Anguleru ñaz nos raigaños culturales más fondos en rellación a la tradición asturiana de la pesca l’angula y céntrase especialmente na imaxe d’esi pescador tranquilu y nocherniegu qu’en llegando a casa apurre l’ayalga del so esfuerciu, faciendo realidá los suaños de los sos seres más queríos.

Nes nueches escures na temporada l’angula, les desembocadures de los ríos asturianos allúmense cola lluz sele de los faroles anguleros, qu’atrayen ensin saber cómo a estos pexiquinos  tresparentes que ñacen na Mar de los Sargazos; criatures misterioses, que clisaes pola lluz sele de los faroles, avérense a los pescadores que les recueyen colos sos serazos, metiéndoles  dempués nos sos vieyos caxones de madera.

N’avientu y xineru, coincidiendo col solsticiu d’iviernu y les fiestes navidiegues, esta postal nocherniega y romántica de los nuesos calces tenía un significáu bien especial pa tolos anguleros. Porque, amás de ser el tiempu nel que más angula se pescaba, l’aumentu d’ingresos que-yos apurría la so venta, dexábalos enfrentase a los gastos navidiegos, onde los regalos de los más pequeños asumíen el protagonismu principal.

Por eso, estos pexiquinos de la lluz convertíense nun regalu que la natura faía a les persones que vivíen na zona, un sofitu importante qu’enllenaba d’ilusión les cases de munches families asturianes. L’angula y l’anguleru yeren, poro, esperanza y felicidá.

Esta ancestral estampa navidiega asturiana foi recuperada nel 2008 pola Asociación Cultural Garabuxada de L’Arena (Sotu’l Barcu), que quixo averar a la reciella la maxa de les alcordances  navidiegues  del pasáu, creando al so entrañable personaxe, L’Anguleru. D’esta manera, convirtieron al pescador del serazu y el farolín nun ser fantásticu que, como hai munchu tiempu faíen los anguleros, enllena d’ilusión los llares asturianos, dexando que los suaños de los más pequeños camuden en regalos, reviviendo’l deséu de lo posible  y tolo que presta escuchar  eses nervioses rises infantiles.