Llega la VI Feria del Llibru y del Discu n’asturianu

Dende que les instituciones asumieren la promoción y proteición de la llingua asturiana, cellébrase cada mes de mayu la Selmana de les Lletres Asturianes. Trátase d’ún de los actos culturales más importantes del añu, tanto pol so calter simbólicu, como pola so contribución al espardimientu de la industria cultural en llingua asturiana.

Pa esta edición, la númberu 39, la Conseyería d’Educación y Cultura preparó un programa d’actos col tema de la lliteratura infantil y pa xente mozo que se fizo y se ta faciendo n’Asturies. El programa preparáu llegará a tola sociedá asturiana ente’l 30 d’abril y el 6 de mayu con actos de toa mena.

Una de les instituciones que collabora col Gobiernu d’Asturies pa llevar esta iniciativa p’alantre ye’l Conceyu d’Avilés. Ente los actos que se van facer na ciudá ta la VI Feria del Llibru y Discu n’Asturianu, entamada xunto cola Asociación de Llibreríes del Principáu. La feria llántase na plaza de Domingo Álvarez Acebal ente’l 3 y el 6 de mayu.