Presentación lliteraria: <> de Damián Barreiro

Yo, la to llingua. Damián Barreiro. Trabe, 2015. 73 páx.

La llingua asturiana cuenta nesti ensayu, en primera persona, la so historia. Recomendáu pa neños y neñes a partir de los ocho años. Los dibuxos, qu’enseñen dellos símbolos iconógráficos de la identidá asturiana en tola historia tien muncha importancia na obra. Al final, va ser el pueblu asturianu’l que decida’l futuru de la so llingua propia.

Na presentación tará l’autor del llibru. Participen escolinos y escolines de los cursos quintu y sextu de Primaria del colexu públicu Palacio Valdés d’Avilés.

La Estaya de la Llingua facilitó varios exemplares de la obra al centru nomáu, pa lleer, trabayar y afondar nel testu, col envís de tener un alcuentru col autor pa plantega-y duldes y entrugues que interesen a les y los llectores.

Dalgún d’estos llibros quedarán na biblioteca de la clase d’asturianu del centru educativu y otros entregaránse a les diferentes biblioteques qu’hai na ciudá.

Damián Barreiro (A Estrada, Pontevedra, 1984), periodista de profesión, dempués de pasar peles redaiciones d’Asturies.com y Les Noticies, collaboró con otros medios, como la televisión llocal de Gijón/Xixón, el periódicu Diagonal Asturies o’l periódicu La Nueva España, na so estaya «Escolinos».

Anguaño collabora cola revista Atlántica XXII. Amás, nel añu 2013 ganó’l Premiu Fierro Botas d’Ensayu por L’espeyu onde miranos: televisiones de proximidá n’Auropa Occidental y procesos de recuperación identitaria. Al añu siguiente recibió’l Premiu Fuertes Acevedo con Caleya sésamu: el papel de la televisión na tresmisión interxeneracional d’una llingua. Tamién ganó’l Premiu d’Investigación Sociollingüística que da l’Academia de la Llingua Asturiana.

Día: 29 de xineru de 2016

Sitiu: Biblioteca Infantil Bances Candamo. Avilés

Hora: 09:15 h.