XIII Seronda n’Avilés

Dientro los actos la XIII Seronda n’Avilés, faise un brinde a toles persones interesaes pa participar nes actividaes propies d’esta época del añu, actividaes que pretenden enseñar les costumes y llabores específiques de la seronda n’Asturies.

Estes costumes y llabores son por exemplu la esfoyaza (separar de la panoya’l granu y la fueya), enrestrar (enllazar o atar varies panoyes), magostar (asar castañes), magüestu(comer castañes asaes acompañaes de sidra dulce) o vaciar calabaces, decorales, pone-yos una vela dientro y adornar los caminos con elles.

Too ello venía acompañao d’esos aconceyamientos vecinales nos que yera normal contar cuentos, lleendes y revivir tradiciones, como son los filandones o’l samartín.

La seronda ye época de trabayu n’andecha, de collaboración y de tresmisión xeneracional de llingua y cultura. La llingua asturiana y la cultura alredor de la seronda beben una de la otra y les dos son una.

La Federación d’Asociaciones Xuntanza, col sofitu del Conceyu d’Avilés, vien organizando esta actividá dende l’añu 2009, siguiendo’l llabor qu’años anteriores facía sola l’Asociación d’Investigación Etnográfica y Folclórica d’Avilés Escontra’l Raigañu, reviviendo asina, dende hai seis años, l’espíritu de la seronda de trabayu en comuña, de sofitu y collaboración, too ello acompañao de música, danza y bonos productos, nun van faltar el pote de berces, l’arroz con lleche, les castañes y la sidra dulce.

Díes: 23, 24 y 25 d’ochobre

Sitiu: Carpa na Plaza de Domingo Álvarez Acebal (al llau de la Casa la Cultura d’Avilés)

Cartel anunciador

Pdf col programa