XIV Concursu de microrrellatos L’Horru d’El Carbayedo

Col aquel d’animar a la creación lliteraria en llingua asturiana, l’Asociación de Vecinos El Hórreo del Carbayedo, en collaboración cola Estaya de la Llingua y col sofitu del Conceyu d’Avilés, entama’l XIV Concursu de microrrellatos L’Horru d’El Carbayedo, nel que pue participar cualesquier escritor o escritora en llingua asturiana, como muncho con dos rellatos orixinales,  nun s’almitiendo los presentaos n’ediciones anteriores.

Los rellatos nun puen pasar de les 500 palabres. La temática ye llibre, pero la redaición tendrá que respetar les normes ortográfiques y gramaticales marcaes pola Academia de la Llingua Asturiana.

El plazu pa presentalos va pesllase a les 14 hores del martes, 1 d’avientu. La presentación pue facese namás per corréu eletrónicu, unviando los rellatos en formatu Word a: avvelhorreo@yahoo.es . Los trabayos dirán encabezaos con un títulu y firmaos namás con un nomatu. Nel corréu elletrónicu axuntaráse un archivu aparte, que la organización (A. VV. El Hórreo) guardará en secretu, ensin que’l xuráu pueda conocelu enantes del fallu, colos datos siguientes: nome, teléfonu, señes, DNI, y títulu del trabayu presentáu al concursu.

El concursu tien un primer premiu de 500 euros y troféu y un segundu de 300 euros y tamién troféu. Los dos premios nun pueden recayer nel mesmu autor o autora. Van pagase  per tresferencia bancaria y, por llei, tarán suxetos a retención d’IRPF.