XVI Xuntes d’Escolines y Escolinos d’Avilés y VL Selmana de les Lletres Asturianes
Compartir
Esti alcuentru d’alumnáu de los centros educativos de Primaria d’Avilés centraráse na obra del escritor avilesín, dibuxante y académicu, Miguel Solís Santos.
Esti añu 2019 l’auditoriu de la Casa la Cultura va acoyer a 606 neños y neñes, alumnáu de 4u, 5u y 6u de Primaria qu’estudien l’asignatura de Lllingua Asturiana, pa participar nes XVI Xuntes d’Escolines y Escolinos d’Avilés.
Los centros participantes son los que vienen darréu:
- CP La Carriona-Miranda
- CP Llaranes
- CP Palacio Valdés
- CP Poeta Juan Ochoa
- CP Sabugo
- CP Apolinar García Hevia
- CP Llaranes
- CP El Quirinal
- CP Marcelo Gago
- Colexu Santo Tomás
- CRA Castrillón -Illas (participación a mou particular por iniciativa propia)
Estos centros lleven trabayando dende los meses de marzu y abril en talleres pa desenvolver esti tema y ponelu en comuña nel auditoriu de la Casa la Cultura. L’actividá entámala la Estaya de la Llingua y coordínala personal especializao de la compañía teatral Nun Tris, que’l Conceyu d’Avilés pon a disposición de maestres y maestros pa preparala.
Cartel Xuntes 2019
Per otru llau, el cartel anunciador de les Xuntes d’esti añu ye’l ganador del IV Concursu de carteles pa centros de Primaria, que sigue’l tema de la obra de Miguel Solís Santos. Nel cartel pueden vese títulos con ilustraciones de parte de la obra escrita del autor, obra de Yassin Arkit García, alumnu de 5u cursu de Primaria del colexu públicu Marcelo Gago. El trabayu ganador recibirá un premiu valoráu en 150 euros pa material escolar, llibros, etc y la publicación del cartel.
Los centros de Secundaria y Bachilleratu (IES Carreño Miranda, IES La Madalena, IES Nº 5, IES Virgen de La Luz, IES Menéndez Pidal y Colexu Santo Tomás) participen col mesmu tema nun concursu nel que pueden presentar trabayos en formatu audiovisual, contando col sofitu de la empresa especializada nesti tipu de formatu, Cuatro Gotes Producciones que’l Conceyu d’Avilés pon a disposición de los centros. El fallu del xuráu sedrá’l día 29 d’abril.
Miguel Solís Santos ñaz n’Avilés en 1956. Llicenciáu en Bioloxía. Profesor de Bioloxía y Xeoloxía nel IES Carreño Miranda. Académicu correspondiente de l’Academia de la Llingua Asturiana, dende la so creación, escritor y dibuxante.
Ye autor de la primer novela en Llingua Asturiana Les Llamuergues Doraes. Ganador en varies ocasiones del Premiu Xosefa Xovellanos de Novela y del Enriqueta Rubín de Periodismu en Llingua Asturiana, en 2007. Accésit na edición de 2000 del Premiu Fuertes Acevedo con La Memoria de les dos Orielles (aprosimación al estudiu de les xeneraciones astur-cubanes). Autor de la novela xuvenil El Misteriu de la Cámara de Cuarzu.
Dibuxante y guionista de delles histories ilustraes, onde destaquen La Hestoria d’Avilés y el trípticu que fizo va poco pal V Centenariu de Pedro Menéndez (2019). Escritor y dibuxante de cuentos pa neños y neñes, como la coleición de Ñuberu, Nosotros los Pexes, Les Xanes, El Cuélebre y La Guaxa -cola so torna al Gallego-Asturiano entitulada A Bruxa-, tamién ye ilustrador de llibros d’otros autores. Collaborador en periódicos asturianos y varies revistes.
Cartelista, autor de varies obres, ente les que destaquen la coleición de les Xuntes d’Escolines y Escolinos d’Avilés -motivu de la presente esposición-, la riestra cartelos del auditoriu de la Casa la Cultura o’l teatru Palacio Valdés y otros que fizo pa diferentes campañes y actividaes, como Navigatio de Samalandrán o Sestaferia del Intercélticu d’Avilés.
