21 de feberu, Día de la Llingua Materna
Compartir
La campaña “Xugamos pa deprender“, que cumple yá’l so cuartu añu entrega a las Escueles Infantiles del Conceyu d’Avilés xuegos pa conocer el nome del cuerpu humanu en llingua asturiana.
El compromisu de la Conceyalía d’Educación d’Avilés pa cola llingua asturiana y la so tresmisión y conocencia pa lo más piquiñino de la casa, vese con programes como “Xugamos pa deprender“.
Entamó yá hai cuatro años esta campaña pa les Escueles Infantiles del Conceyu. Avilés foi’l primer Conceyu d’Asturies que preparó un material d’esti tipu. Esti añu la propuesta ye continuación de la del añu pasáu que se dedicó al cuerpu humanu tamién, pero a les partes de la cabeza. Nesta ocasión van recibir un material nuevu, consistente nun doble xuegu col que van deprender los nomes del cuerpu humanu, en concretu de les partes del troncu, a mou de pieces que tienen de dir encaxando y que van posaes nuna alfombra onde tán pintaes estes partes. Ye doble, porque hai pieces del troncu per delantre y per detrás en bolses individuales pa cada parte.
L’oxetivu de la campaña ye que les neñes y los neños d’Avilés deprendan vocabulariu básicu n’asturianu gracies al xuegu. Asina, a cada Escuela de 0-3 va dáse-yos a partir de mañana varies caxes con material diseñáu pola empresa avilesina Signum, mui afayadizu pa la reciella, Esti añu, como nun se puede compartir el material, hai varies caxes en cada centru, pa que cada caxa del xuegu tea en cada clase y nun se lleve d’una clase pa otra. Asina van repartise 6 caxes na escuela d’El Quirinal, tres na escuela de La Toba y dos na escuela de La Madalena.
Na caxa hai varies fiches con retratos de les partes del troncu per delantre y per detrás col so nome n’asturianu: pescuezu, llombu, bandullu…, son exemplos de lo que se van atopar. Neños y neñes podrán rellacionalos col so contornu nuna alfombra, onde les pieces encaxen como si fueren un rompecabeces.
