Cargando

Testu a buscar

Noticies

Día Internacional de la Diversidá Biolóxica

Compartir

Ye una fecha que se celebra’l 22 de mayu por decisión de l’Asamblea Xeneral de les Naciones Xuníes del 20 d’avientu de 2000. Esti día creóse pa “informar y concienciar a la población y a los Estaos sobre cuestiones rellacionaes cola biodiversidá”. Esta fecha escoyóse por coincidir col aniversariu de l’aprobación del Conveniu sobre la Diversidá Biolóxica, firmáu en 1992.

La Estaya de la Llingua celebra esti día con un vidiu mui especial, con una visita virtual al Cañón d’Avilés o Caladeru de Carrandi. Nesti proyeutu audiovisual contamos cola collaboración del biólogu Miguel Solís Santos, la bióloga Deva Blanco Machicado y tamién una aportación mui importante que ye la de la Fundación Diversidá del Ministeriu de Transición Ecolóxica y Retu Demográficu, dexando l’usu d’imáxenes y audiovisual grabaos nel propiu Cañón.

El Cañón d’Avilés o Caladeru de Carrandi 

Ye un gran valle submarín asitiáu a 7 milles de la mariña asturiana na mar Cantábrica consideráu’l de mayor fondura del mundu.

L’ecosistema del Cañón ye una de los más importantes y diversos de la plataforma de la mar Cantábrica. Dientro del mesmu pueden atopase dellos ecosistemes rellacionaos cola variación de la fondura. Nel mesmu pueden atopase zones de gran importancia reproductora pa delles especie; amás, el Cañón d’Avilés tamién ye una zona de camín de ballenes, tolines o calderones ente otres grandes especies marines. Importante destacar equí la presencia del coral d’agua frío, coles especies atopaes Lophelia pertusa o Madrepora oculata

Paez tamién posible atopar les especies Architeuthis dux o Taningia danae de calamar xigante, esti míticu animal que n’Asturies la xente de la mar noma “Peludín”.

L’ecosistema del Cañón tien d’enfrentase a munchos peligros ente los que destaquen la esplotación pesquera de la zona, l’ampliación del puertu d’Avilés, el tráficu marítimu de la zona y la presión humana con arramaos d’agües residuales y desenvolvimientu costeru. Poro, ye importante conocelu y da-y el valir biolóxicu incalculable que tien y qué meyor que nesti día de la Diversidá Biolóxica pa ello.