Talleres d’animación a la llectura en Samartín del Rei Aurelio

Coincidiendo cola décimocuarta edición de les Xornaes de Lliteratura Infantil y Xuvenil que se celebren nel mes de payares en Samartín del Rei Aurelio, la Oficina de Normalización Llingüística del conceyu, en colaboración coles asociación culturales Bocina Nalón y Reciella Malory y la Oficina d’Información Xuvenil vuelven a ufiertar unos talleres d’animación a la llectura colos que se nagua por averar la lliteratura asturiana a les xeneraciones más moces.

Los talleres son de baldre y tán destinaos a neños y neñes d’ente 4 y 13 años.  P’apuntase hai que llamar a Bocina Nalón, al teléfono 984112239 o unviar un corréu a bocina@bocina.org. El plazu pa facelo termina’l 3 de payares. Les sesiones van tener llugar los vienres 6, 13 y 27 d’esi mesmu mes na Casa de la Mocedá de Sotrondio a les 18 h. , con una duración d’hora y media cada sesión. Amás, l’últimu día nesti mesmu centru va tener llugar la inauguración d’una esposición onde se van recoyer los trabayos de los participantes.