7 de mayu, Día de les Lletres Asturianes

Esti día ye la xornada na qu’asturianos y asturianes homenaxamos la lliteratura escrita en llingua asturiana. Vien celebrándose dende l’añu 1980 y enmárcase na Selmana de les Lletres Asturianes.

Dientro’l ciclu que la Estaya de la Llingua vien faciendo dedicáu a determinaos Díes Especiales del año y coincidiendo con esti día tan especial  va emitise un audiovisual grabáu nel teatru Palacio Valdés onde varies persones d’estayes diferentes de la villa avilesina van lleer testos propios o testos d’escritores d’Avilés d’époques anteriores qu’escribíen les sos obres en llingua asturiana, como Marcos del Torniello, Bernardo Guardado o Matilde de Soignie. Contaremos cola collaboración de persones adultes y neñes, cantantes, escritores, actores y d’otros sectores profesionales. Un homenaxe mui participativu y entrañable a la nuestra llingua, grabáu nun marcu incomparable como ye’l teatru Palacio Valdés, contando por supuesto tamién cola Fundación Municipal de Cultura del Conceyu d’Avilés que punxo los medios materiales y humanos pa qu’esto fuere posible.

Podrá vese a partir de les 00:00 hores del vienres 7 de mayu nes redes sociales del Conceyu d’Avilés, na revista dixital de la Fundación Municipal de Cultura, na web municipal, na web de la Estaya de la Llingua y na plataforma dixital PlayPresta.

Otra de les actividaes mui especial nesi día va ser la entrega de varies caxes del puzzle Ayalgues Asturianes a tolos centros educativos d’Avilés de Primaria, públicos y concertaos, onde s’imparta l’asignatura de llingua asturiana. Esta iniciativa débese a la decisión de la empresa Acuto Xuegos, col so representante y diseñador de varios xuegos en llingua asturiana,  Félix Fernández qu’en collaboración cola Estaya de la Llingua decidió esta donación nesti día tan especial d’homenaxe.