Ciclu Caleyavilés 2026

Col veranu vuelve Caleyavilés, una oportunidá pa redescubrir los requexos más guapos d’Avilés, al mesmu tiempu que se puxa pol usu de la llingua asturiana. Failo con un calendariu que dobla la propuesta del añu pasáu y qu’inclui tamién el mes de setiembre. Asina, dende xunu a setiembre, la Estaya de la Llingua de la Conceyalía de Normalización Llingüística entamó un ciclu de seis visites guiaes per otros sitios de la ciudá que se correspuenden con temátiques diferentes.

Cada visita, que va durar ente una hora, hora y media, tien acutaes 20 places y la participación ye de baldre. P’apuntase, ye necesario contautar per corréu electrónicu estayallingua@aviles.es, llamando al 985 545 508, o mandando un Whatsapp nel 634 821 613. Toles visites son a les 19:00 hores, menos la del día 22 pela Ría que sedrá a les 11:00 de la mañana y la única que ye de miércoles, les demás toes son los vienres.

La primer visita sedrá’l vienres, 26 de xunu, y tendrá como escenariu l’Avilés medieval visitando la capiya de Las Alas. Saliendo de la Plaza España, de delantre los arcos del edificiu de la Casa Conceyu, percuerre ún de los cascos históricos meyor conservaos del páis con esplicación de los restos de la Edá Media que tovía se caltienen, como los llenzos de la muralla rescataos hai poco.

En xunetu habrá dos salíes, lo mesmo que n’agostu, al ser los meses centrales del veranu y el momentu nel que la xente pide más actividaes pa facer. Poro, el vienres 10 programóse una escursión pel ensanche barrocu de la ciudá con visita al Palaciu de Valdecarzana y el miércoles 22, un paséu en llancha pela Ría, recalando n’Espaciu Portus.

El vienres 7 d’agostu visitaráse’l Parque Ferrera pa conocer los árboles propios d’Asturies como’l texu y el carbayu, y otra flora autóctona, y el vienres 21 sedrá’l día pa conocer el Cementeriu La Carriona y el so patrimoniu cultural y arquiteutónicu tan bayurosu, con visita al so centru d’interpretación.

Pa setiembre, el vienres 11, programóse un percorríu pel Avilés de lleenda pa descubrir histories populares y otros cuentos de la mitoloxía asturiana. Con esta propuesta pieslla’l ciclu de Caleyavilés 2026 pa conocer requexos destacaos de la ciudá y descubrir los sos secretos.

Los y les menores tendrán de tar con una persona adulta y recomiéndase llevar calzáu cómodo.

Programa CaleyAvilés 2026

• Vienres 26 de xunu. Avilés Medieval. 19:00 h.
• Vienres 10 de xunetu. Avilés y l’ensanche barrocu. 19:00 h.
• Miércoles 22 de xunetu. Ría d’Avilés y Espaciu Portus. 11:00 h.
• Vienres 7 d’agostu. Parque Ferrera y l’edificiu de La Noria. 19:00 h.
• Vienres 21 d’agostu. Cementeriu La Carriona y CICLAC. 19:00 h.
• Vienres 11 de setiembre. Avilés de lleenda. 19:00 h.