Guía: Avilés y los sos Parques I: El parque Ferrera

Avilés y los sos parques I: El parque Ferrera, ye una nueva edición de guíes que s’incluye dientro de la coleición que la Conceyalía de Cultura xunto cola Estaya de la Llingua entama a desendolcar nel añu 2008. D’aquella dióse salida al trabayu que ficieren alumnes de la Universidá d’Uviéu sobre los monumentos históricos de la ciudá y agora preténdese siguir cola mesma llinia de publicación, asoleyando agora l’otru patrimoniu de la ciudá, el natural. Faciendo un percorríu pelos parques principales d’Avilés podemos dir estudiando árboles y arbustos, significativos pa la cultura asturiana, poro nun tien de considerase’l conteníu como científicu, sinón dafechamente cultural.  Siguióse’l mesmu modelu de l’anterior, pretendiéndose a lo cabero xuntar información de los aspectos más destacables, dende’l puntu de vista natural y monumental que s’atopen na villa. Pensóse nuna edición amañosa pa que s’emplegue ensin que’l llector o llectora s’atope col problema d’un llibru enforma pesáu poles sos dimensiones. Nesti casu, como nel anterior, escuéyese un diseñu modernu, afayadizu y prestosu, col envís d’algamar pal futuru una edición de guíes coleicionables sobre dellos aspeutos importantes del patrimoniu avilesín.