Presentación
¿Quién somos?
La Estaya de la Llingua del Conceyu d’Avilés ye un Serviciu del Conceyu d’Avilés enfotáu na normalización y el desendolcu de la llingua asturiana en toles estayes de la vida social y cultural.
Esti llabor de normalización ye mui importante pal caltenimientu, espardimientu y conocencia de la nuestra llingua y, per aciu d’ella, de tola cultura asturiana. Ye necesario afitala en tolos ámbitos de la sociedá pa poder asina protexer el nuestru patrimoniu cultural.
¿Ónde tamos?
Na Casa la Cultura, primer pisu;
Plaza Domingo Álvarez Acebal, nº 2
33402 Avilés
Teléfonu: 985 54 55 08
estayallingua@ayto-aviles.es
¿Cuál ye’l nuestru enfotu?
La Estaya de la Llingua quier facer un llabor empobináu a la normalización y emplegu dafechu de la llingua asturiana en tolos ámbitos de la sociedá, per aciu de:
- Un serviciu permanente de sofitu llingüísticu, traducción y correición de testos de toa mena pa la propia Alministración, asociaciones, empreses y particulares.
- Informar de los cursos de llingua asturiana, drechos y deberes llingüísticos y tolo que tenga que ver cola llingua y la cultura asturianes.
- Plantegar campañes nes que se “normalice” la llingua asturiana, onde se promocione, implicando a entidaes públiques y privaes.
- Actividaes empobinaes a los escolinos y escolines del Conceyu, enanchando’l campu d’aición tamién a la mocedá y a la xente adulto.
- Participar y collaborar nes aiciones de promoción llingüística del Gobiernu d’Asturies nos conceyos asturianos.
