Presentación de la novela pa la mocedá, Urraca l’asturiana de Cristina Muñiz

El vienres 14 d’ochobre, preséntase nel Palaciu de Valdecarzana d’Avilés a les 18:00 hores la novela Urraca l’asturiana, de la que ye autora Cristina Muñiz Martín. Novela curtia escrita pa la mocedá, sobre la vida d’Urraca, reina d’Asturies y Navara y señora d’Ayer. Fía del rei Alfonso VII y de Gontrodo Petri, fía de Pedro Díaz de Tinéu. Urraca naciere en Pel.luno, pueblu del conceyu d’Ayer. Llamóse Urraca pola so güela paterna, Urraca I reina de Castiella y Lleón. Casáronla a los trece años col rei García Ramírez de Navarra. En quedando viuda, fízose cargu del gobiernu d’Asturies hasta que fuere esterrada pol so hermanu, acusada de rebelión.

Cristina  Muñiz Martín Narradora, creadora de monólogos y escritora de guiones radiofónicos. Títulos de llibros de rellatos como Onde pisen porque  güelles (2005), El buscador d’histories (2007) y Karias (2008); la novela  Ventiocho díes (2008);   monólogos del llibru Ente muyeres, guiones de radio, lliteratura infantil con Dingurindaines (2010)  o La pota encarnada (2011) y agora la novela histórica pa la mocedá,  Urraca l’asturiana (2011), sirven pa conocer a esta autora en llingua asturiana, que toca xéneros bien diferentes, pero que toos comparten el bon facer y el gustu pola lliteratura cuidada, que llega a neños y neñes, a la mocedá y al públicu adulto en xeneral.